Ինչու ենք մենք հսկում
ՀՀ ԿԲ-ն իր՝ հսկողության իրականացման քաղաքանակությամբ, որպես հսկողության նպատակներ է սահմանել հետևյալը․
- Ապահովել ՀՀ-ում գործող վճարահաշվարկային և արժեթղթերի հաշվարկային համակարգերի կայունությունը (անվտանգությունը)՝ ռիսկերի սահմանափակման (զսպման) միջոցով:
Վճարահաշվարկային և արժեթղթերի հաշվարկային համակարգերի կայունության ապահովումը կարևոր է, քանի որ վճարային և արժեթղթերի հաշվարկային համակարգերը կարող են հանդիսանալ համակարգային ռիսկերի առաջացման և տարածման միջավայր: Համակարգային ռիսկի առաջացման աղբյուրը կարող է տարբեր լինել: Նման իրավիճակ կարող է առաջանալ, օրինակ, երբ տեխնիկական վթարի հետևանքով խափանվում է համակարգի սահուն գործունեությունը կամ երբ համակարգի մասնակիցներից մեկը անկարող է կատարել իր ֆինանսական պարտավորությունները, և համակարգում բացակայում են հատուկ մեխանիզմներ, որոնք կարող են սահմանափակել տեխնիկական վթարի կամ ֆինանսական խնդիրների բացասական հետևանքների շղթայական տարածումը այլ մասնակիցների վրա:
- Ապահովել ՀՀ-ում գործող վճարահաշվարկային և արժեթղթերի հաշվարկային համակարգերի գործունեության արդյունավետությունը:
Վճարահաշվարկային և արժեթղթերի հաշվարկային համակարգերի արդյունավետության տեսակետից կարևոր է, թե ինչքանով է համակարգը բավարարում մասնակիցների և վերջիններիս հաճախորդների պահանջները և սպասումները, ինչքանով է համակարգի տեխնիկական ապահովումը ճկուն՝ արձագանքելու համար նոր տեխնոլոգիաներին և շուկայի նոր պահանջներին, ինչպես նաև որքանով է իրականացվում օպերատորի կողմից ծախքերի հսկողությունը և արդյունավետության մշտական վերլուծությունը՝ այդ թվում՝ կապված գնագոյացման հետ: Համակարգի անարդյունավետ աշխատանքը կամ ոչ նպատակաուղղված գործունեությունը կարող է բացասաբար անդրադառնալ ֆինանսական շուկայի/կամ դրա որոշակի հատվածի վրա, նպաստել ռիսկերի առաջացմանը, այդ թվում` մասնակիցների և վերջնական սպառողների համար: Բացի այդ, համակարգում անվտանգության բարձրացման համար օպերատորները կարող են մեծ ծախսեր կատարել, որոնք սակայն միշտ չեն լինում արդարացված, ուստի համակարգի արդյունավետության բարձրացման նկատառումներից ելնելով՝ կարևորվում է կենտրոնական բանկերի կողմից արդյունավետության ամրագրումը՝ որպես հսկողության կարևոր նպատակ:
Բացի վերոնշյալ հիմնական նպատակներից, ՀՀ ԿԲ-ն կարևորում է նաև հանրության վստահության ամրապնդումը անկանխիկ վճարումների նկատմամբ՝ սահմանելով այն որպես հսկողության օժանդակ նպատակ: